‘அன்பில் அவன்’ வெற்றியைக் கொண்டாடிய படக்குழு

ஐங்கரன் இன்டர்நேஷனல் மற்றும் ஹேப்பி ஹை பிக்சர்ஸ் நிறுவனங்கள் இணைந்து தயாரித்துள்ள, அசோக் செல்வன்–ப்ரீத்தி முகுந்தன் நடிப்பில், இயக்குநர் ஆர். கார்த்திகேயன் இயக்கிய ‘அன்பில் அவன்’ திரைப்படம் ரசிகர்களின் ஆதரவுடன் திரையரங்குகளில் வரவேற்பைப் பெற்று வருகிறது. இதையொட்டி படக்குழுவினர் வெற்றியைக் கொண்டாடும் வகையில் நன்றி தெரிவிக்கும் நிகழ்ச்சியை நடத்தினர்.

இதில் பத்திரிகை மற்றும் ஊடக நண்பர்களைச் சந்தித்த படக்குழுவினர், திரைப்படத்துக்கு ஆதரவளித்ததுடன், ரசிகர்களிடம் படத்தைக் கொண்டு சேர்த்ததற்கும் நன்றி தெரிவித்தனர். இயக்குநர் கார்த்திகேயன், நடிகர்கள் அசோக் செல்வன், ப்ரீத்தி முகுந்தன், கதிர்பாலு, மஹா டெல்லி கணேஷ் உள்ளிட்டோர் கலந்துகொண்டு படத்தின் உருவாக்க அனுபவங்களையும், ரசிகர்களின் வரவேற்பையும் பகிர்ந்துகொண்டனர்.

இயக்குநர் கார்த்திகேயன் பேசுகையில், 

“ஆரம்பத்திலிருந்து ஆதரவளித்து வரும் பத்திரிகை மற்றும் ஊடக நண்பர்களுக்கு நன்றி. ரசிகர்கள் படத்துடன் உணர்வுபூர்வமாகத் தொடர்புபடுத்திக்கொண்டு தங்களது அனுபவங்களைப் பகிர்வது மகிழ்ச்சியாக இருக்கிறது. தயாரிப்பாளர்களுக்கு லாபம் கிடைப்பதுடன், நாம் உருவாக்கிய படம் மக்களிடம் சரியாகச் சென்றடைவதும் முக்கியம். ‘அன்பில் அவன்’ படத்தில் இந்த இரண்டும் நடந்துள்ளன.

குறிப்பாக குடும்பத்தை நேசிக்கும் ஆண்கள் மற்றும் கதாபாத்திரங்கள் ஏற்படுத்திய தாக்கம் குறித்து ரசிகர்கள் பகிரும் கருத்துகள் நெகிழச் செய்கின்றன. இப்படத்தில் பணியாற்றிய தொழில்நுட்பக் கலைஞர்கள், இயக்குநர் குழுவினர், ஆர்ட் டைரக்டர் மணிகண்டன் ஸ்ரீனிவாசன், காஸ்ட்யூம் டிசைனர் பினிட்டா ராமநாதன், மக்கள் தொடர்பாளர் யுவராஜ், விளம்பரக் குழுவினர் என அனைவருக்கும் நன்றி. திங்க் மியூசிக் நிறுவனத்தினரும் தொடர்ந்து ஆதரவளித்தனர்.

அசோக் செல்வன், ப்ரீத்தி முகுந்தன் உள்ளிட்ட அனைவரும் சிறந்த பங்களிப்பை வழங்கியுள்ளனர். குறிப்பாக ப்ரீத்தியின் நடிப்பும், இறுதிக்காட்சிகளில் அவர் வெளிப்படுத்திய உணர்வுகளும் பாராட்டுக்குரியவை.

அசோக் அண்ணா இந்தப் படத்தை என்னிடம் ஒப்படைத்தபோது மிகப்பெரிய பொறுப்பை உணர்ந்தேன். விக்னேஷ் ராஜ் எழுதிய கதையைத் திரைக்கதையாகச் செம்மைப்படுத்தவும், அதைத் திரையில் சிறப்பாகக் கொண்டுவரவும் உதவிய அனைவருக்கும் நன்றி. ஒரு நல்ல தயாரிப்பு நிறுவனத்தின் ஆதரவு புதிய இயக்குநர்களுக்கு மிகவும் முக்கியம். திரைக்கதையைப் பலரும் பாராட்டுவதும், பல இயக்குநர்கள் படத்தைப் பார்த்துவிட்டு பாராட்டியதும் ஊக்கமளிக்கிறது.

என் வாழ்க்கையில் என் தந்தை வழிகாட்டியதைப் போல, சினிமாவில் அசோக் அண்ணா எனக்கு வழிகாட்டியிருக்கிறார். நான் எழுதிய முதல் திரைக்கதையை அவரிடம் கொடுத்தபோது, மறுநாளே மிகவும் பிடித்திருப்பதாகத் தெரிவித்தார். அது எனக்கு மிகப்பெரிய நம்பிக்கையைத் தந்தது. புதிய இயக்குநர்களுக்கு வாய்ப்பளித்து அவர்களுக்கான பாதையை உருவாக்கித் தருகிறார். நான் கேட்டதைவிட அதிகமாகவே இந்தப் படத்துக்காகச் செய்து கொடுத்துள்ளார். அவருக்கு மனமார்ந்த நன்றி. அவருடைய வெற்றிப் பயணத்தில் ஒரு பகுதியாக இருந்ததைப் பெருமையாகக் கருதுகிறேன்.” என்றார்,

ப்ரீத்தி முகுந்தன் பேசுகையில்,

“இந்தப் படத்தைப் பற்றி நாங்கள் கடைசியாக மேடையில் பேசுகிறோம் என்று நினைக்கும்போது மிகவும் உணர்ச்சிபூர்வமாக இருக்கிறது. படக்குழுவினர், தொழில்நுட்பக் கலைஞர்கள் என அனைவருக்கும் ஏற்கெனவே நன்றி தெரிவித்துவிட்டேன். இப்போது பத்திரிகை மற்றும் ஊடக நண்பர்களுக்கு நன்றி சொல்ல விரும்புகிறேன்.

படத்தைப் பற்றிய அனைத்து விமர்சனங்களையும் படித்தேன். படம் எப்படி இருக்கிறது என்பதைத் தாண்டி, அதன் பின்னால் இருக்கும் உழைப்பையும் ஆர்வத்தையும் கவனித்து அழகாக விமர்சனங்களை எழுதியிருந்தீர்கள். அதற்காக மனமார்ந்த நன்றி.

படம் வெளியானது முதல் ரசிகர்களிடமிருந்து நிறைய செய்திகள் வருகின்றன. குறிப்பாக பெண்களும் இளம் பெண்களும் தங்களுடைய உணர்வுகளைப் பகிர்ந்துகொண்டது மகிழ்ச்சியாக இருந்தது. ஒரு திரைப்படம் பார்வையாளர்களின் மனதைத் தொட்டு, அவர்களை உணர்ச்சிவசப்பட வைக்கிறது என்றால் அதுவே மிகப்பெரிய விஷயம். எனக்குப் பிடித்த சில திரைப்படங்கள் என் வாழ்க்கையிலும் மாற்றத்தை ஏற்படுத்தியிருக்கின்றன. அதுபோல் நாங்கள் உருவாக்கிய படமும் மற்றவர்களின் மனதில் தாக்கத்தை ஏற்படுத்துகிறது என்றால், அதை ஒரு வரமாகவே பார்க்கிறேன்.

இந்தப் படத்தை முதன்முதலில் பார்த்த அனுபவம் மிகவும் உணர்ச்சிகரமானது. பதற்றம் காரணமாகத் தொடக்கத்திலிருந்து திரையரங்கில் அமர்ந்து பார்க்க முடியவில்லை. படம் ஓடிக்கொண்டிருந்தபோது உள்ளே சென்று, பக்கவாட்டுப் படிக்கட்டில் நின்றபடியே பார்க்கத் தொடங்கினேன். இயக்குநர் கார்த்திக், அசோக் உள்ளிட்ட படக்குழுவினரும் அப்போது என்னுடன் இருந்தார்கள். சுமார் ஒன்றரை மணி நேரம் நின்றுகொண்டே முழுப் படத்தையும் பார்த்தேன். அப்போது கண்களில் கண்ணீர் வந்தது.

படம் எப்படிப்பட்ட வரவேற்பைப் பெறும் என்பதைத் தாண்டி, நாங்கள் உருவாக்கிய படத்தைப் பார்த்து பெருமையாகவும் மகிழ்ச்சியாகவும் உணர்ந்தேன். அவ்வளவு உணர்வுப்பூர்வமாகவும் அழகாகவும் படம் அமைந்திருந்தது. ஒரு நடிகையாக இப்படிப்பட்ட திரைப்படத்தில் நடிப்பது உண்மையிலேயே ஒரு வரம். எதிர்காலத்தில் இந்தப் படத்தைத் திரும்பிப் பார்க்கும்போதும் இதில் நடித்ததற்காகப் பெருமைப்படுவேன்.

படத்தின் காட்சியமைப்பும் ஒளிப்பதிவும் மிகவும் அழகாக இருந்தன. ஒவ்வொரு காட்சியிலும் இருக்கும் பரபரப்பு, உணர்வுகள், காதல் என அனைத்தையும் திரையரங்கில் உணர முடிந்தது. ஒரு சிறந்த சினிமா அனுபவத்தை இந்தப் படம் கொடுத்திருக்கிறது.

இந்தப் படத்தில் எனக்குக் கிடைத்த வாய்ப்புக்காக இயக்குநர் கார்த்திக்கிற்கு நன்றி. எனக்கு நடிப்பதற்கு நிறைய இடம் கொடுத்து, கதாபாத்திரத்தையும் அழகாக எழுதியிருந்தார். குறிப்பாக இன்ஸ்பெக்டர் கதாபாத்திரத்துடன் எனக்கு வரும் காட்சிகளைப் பலரும் பாராட்டினார்கள். அந்தக் காட்சிகளைப் பற்றி சமூக வலைதளங்களில் பலர் பகிர்ந்துகொண்டதைப் பார்க்கும்போது மகிழ்ச்சியாக இருந்தது.

இந்தப் படம் உண்மையிலேயே மனதைத் தொடும் அழகான சினிமா அனுபவம். எனவே அனைவரும் திரையரங்கிற்குச் சென்று படத்தைப் பார்த்து ஆதரவளிக்க வேண்டும். மக்கள் படத்தை ரசித்துப் பாராட்டுவதைப் பார்ப்பதில் மிகுந்த மகிழ்ச்சி. உங்கள் அனைவரின் ஆதரவுக்கும் மீண்டும் நன்றி.” என்றார்

அசோக் செல்வன் பேசுகையில்,

“இந்தப் படத்தை வெற்றிப் படமாக்கிய மக்களுக்கு முதலில் நன்றி. ‘ஓ மை கடவுளே’ உள்ளிட்ட படங்களுக்கு மக்கள் கொடுத்த ஆதரவுதான் எனக்கு மிகப்பெரிய பலம். அந்த வரிசையில் ‘அன்பில் அவன்’ படத்தையும் பார்க்கிறேன்.

காதல் கதையாகத் தொடங்கி, த்ரில்லர், ஆக்‌ஷன் எனப் பல ஜானர்களில் பயணிக்கும் வகையில் இந்தப் படத்தை உருவாக்கியிருக்கிறோம். படம் பார்த்துப் பலர் உணர்ச்சிவசப்பட்டதாகக் கூறுகிறார்கள். படத்தில் சில குறைகள் இருக்கலாம். ஆனால், இதன் இதயமும் ஆன்மாவும் சரியான இடத்தில் இருப்பதாக நம்புகிறேன்.

படம் வெளியானது முதல் பத்திரிகை, ஊடக நண்பர்கள் மற்றும் ரசிகர்கள் அளித்த ஆதரவுக்கு நன்றி. கடும் போட்டிகளுக்கு மத்தியில் வெளியானாலும், படம் தொடர்ந்து வளர்ந்து தற்போது லாபகரமான நிலையை எட்டியுள்ளது. இன்னும் பலர் இந்தப் படத்தைத் திரையரங்கில் பார்க்க வேண்டும். மற்றவர்களின் விமர்சனங்களை மட்டும் நம்பாமல், படத்தைப் பார்த்து உங்களுடைய கருத்தை நீங்களே முடிவு செய்யுங்கள். இந்தப் படம் பின்னாளில் இன்னும் அதிகமாகப் பேசப்படும் என்ற நம்பிக்கை உள்ளது.

இந்தப் படத்தில் பணியாற்றிய ப்ரீத்தி முகுந்தன், இயக்குநர் கார்த்திகேயன், ஒளிப்பதிவாளர் கௌதம், இசையமைப்பாளர் கோவிந்த் வசந்தா, பீட்டர் ஹெய்ன் மாஸ்டர் உள்ளிட்ட தொழில்நுட்பக் குழுவினர் அனைவருக்கும் நன்றி. கடந்த இரண்டு ஆண்டுகளாக இந்தப் படத்துக்காக அனைவரும் முழு உழைப்பையும் கொடுத்திருக்கிறோம். எனது பெற்றோர், மனைவி மற்றும் குடும்பத்தினர் அளித்த ஆதரவும் முக்கியமானது. அபி உள்ளிட்ட தயாரிப்புக் குழுவினர், நண்பர்கள், பத்திரிகை மற்றும் ஊடக நண்பர்கள் அனைவருக்கும் மனமார்ந்த நன்றி.

ஒரு தயாரிப்பாளராக இந்தப் படத்தின் மூலம் திறமையான நடிகர்களுக்கு வாய்ப்பளிக்க முடிந்தது மகிழ்ச்சி. நானும் சினிமாவுக்கு வருவதற்காகப் பல ஆடிஷன்களில் பங்கேற்றிருக்கிறேன். அதனால் திறமையானவர்களுக்குச் சரியான வாய்ப்பு கிடைக்க வேண்டும் என்ற எண்ணம் எப்போதும் இருந்தது.

மஹா, கதிர், ஆகாஷ், பிரவீன், தீபன் உள்ளிட்ட பலருக்கு இந்தப் படம் நல்ல அடையாளத்தைத் தந்திருப்பதாக நம்புகிறேன். காதலின் ஆழத்தையும் உணர்வுகளையும் பேசும் இந்தப் படம், காதலிப்பவர்கள், காதலித்தவர்கள் எனப் பலருக்கும் நெருக்கமான அனுபவமாக இருக்கும். இன்னும் திரையரங்கில் பார்க்காதவர்கள் அவசியம் பார்த்து ஆதரவு தர வேண்டும்.” என்றார்

கடந்த அக்டோபர் 2-ந்தேதி திரையரங்குகளில் வெளியான ‘அன்பில் அவன்’, காதல் மற்றும் ஆக்‌ஷன் கலந்த கதைக்களத்துடன் தொடர்ந்து ரசிகர்களின் கவனத்தை ஈர்த்து, வெற்றிகரமாக ஓடிக்கொண்டிருக்கிறது.